Yè, chèf vini nan bouk la, se pa de ti lwanj yo fè majistra a. Rete pou yo pote l sou tèt afòs yo kontan jan li gouvènen komin lan. Epi vire yo vire do, men lèt revokasyon majis rive. Byen chita pa di byen monte vre, depi m wè majis atè apre tout lwanj yo fè li yè a. 

Kisa ou vle pou m fè madanm ? Se twa grenn dola ou ban m pou m al fè mache. Longè bouji ou longè priyè ou. Ou pa kab vle pou yo lonje tout mache a ban mwen pou twa dola. Yo vann mwen pou mezi kòb m te pote.

Ti mesye olye nou chita ap ranse, pito nou ale lekòl, tande. Atansyon timoun ! Pakse pi ta pi tris. Avanse peyi a ap avanse wi. Depi koulye a, se nan di moun ki pa t fè anpil tan lekòl jwenn yon djòb, atò ale wè pou pita. Si nou konn bout, pito nou pran lekòl oserye.

Men rès lajan ki rete sou mwa travay ou. Yon fwa ou te pran senk dola. Yon lòt fwa, ou te fè m bay madanm ou  sèt. Sa fè douz. Regle jis pa gate zanmi. Poutèt sa m pran douz dola a sou salè ou. Konte rès la devan m epi yon ti sinyati kote ou wè m fè ti kwa sa a.